兩個人的路 - 但見新人笑，哪聞舊人哭

好多人失戀之後，都會陷入好深嘅負面情緒入邊。食唔落、瞓唔好、不斷懷疑自己、不停回想過去，甚至自暴自棄，以為只要自己夠慘、夠難過，就可以喚回對方嘅心疼，令一段已經完結嘅關係重新開始。

但其實你有無諗過，你依家所有嘅難過、折磨、抑鬱、失眠，對方其實一啲感覺都冇。你喺度痛到撕心裂肺，佢可能已經繼續過住自己嘅生活；你喺度否定自己，佢亦都唔會因為咁樣回頭。

更殘酷卻真實嘅係，但見新人笑，哪聞舊人哭。如果佢已經開始新一段戀情，只會完全沉醉喺新相處嘅新鮮感同甜蜜入邊，眼裡只有歡笑，根本唔會再留意你嘅情緒，亦都唔會在意你過成點。你所有嘅執著同難過，到頭來其實都毫無意義。

你傷害自己，只會傷到真正愛你嘅人，永遠傷唔到一個決心要走嘅人。

更唔好做嘅，係用情緒去勒索對方。不停發長訊息、不停道歉、不停卑微挽留，用難過去綁住人哋，就算暫時留住佢，呢段感情都已經變質。靠可憐換回來嘅從來不是愛，只係憐憫；靠委屈維繫嘅關係，只會令你之後更加痛苦，更加失去尊嚴。

一段真正嘅感情，從來唔需要你卑微去求，亦都唔需要你犧牲自我去留。對方選擇離開，其實已經講明一切：佢唔再珍惜你，亦都唔值得你繼續為佢消耗。

失戀從唔係你唔好，只係你哋唔合適，緣分到呢度為止。你值得被人堅定選擇，值得被人好好珍惜，而唔係喺一段不屬於你的關係入邊，不斷委屈自己、討好別人。

好好照顧自己，好好食一餐，好好休息，慢慢將注意力放回自己身上。你要等嘅從來唔係佢回頭，而係你重新振作、重新發光嘅一日。當你愛返自己，真正適合你的人，先會有機會走到你身邊。