幾段情歌 - 連名帶姓 『放生容易放下難』

連名帶姓

原唱：張惠妹 作詞：葛大為 作曲：周杰倫

近排偶然睇到 A-Lin 黃麗玲同張碧晨合唱《連名帶姓》呢個舞台，兩把好有故事感嘅聲線，將歌裡那種藏在心裡、放不下舊愛嘅無奈同執念，演繹得特別入心。一向都聽慣張惠妹嘅原唱，已經好有滄桑味道，但呢個合唱版本情感層次更濃、更細膩，聽落感覺甚至超越原唱，亦正因為呢個現場，勾起我滿滿嘅心事同回憶，好想同大家分享呢首歌裡最觸動人心嘅幾份感受。

零七年那一首定情曲的前奏

要是依然念念不忘太不稱頭

早放生彼此好好過

都多久

有好多舊感情，過去咗好多年，理性上其實好清楚，最體面嘅做法就係放生彼此，大家各自放下、各自安好，唔好再對從前念念不忘，勉強糾結落去只會折磨自己。但感情從來都唔係理智話到做到，明明道理都明白，卻偏偏做不到真正放下，只可以將呢份牽掛收埋喺心底，表面裝作風平浪靜，內心從來冇真正捨得放生過。

你怎麼像標本杵在我心裡頭

後來的那幾個 又沒做錯什麼

他們口中自私的我

犯了偷竊時間的錯

複製貼上你的愛

呢段歌詞真係好戳心，一個人一旦深深愛過，就會好似定格咗喺心裡，一世都揮之不去。後來人生路上都會遇見新嘅人，其實邊個都冇做錯，亦都真心想靠近珍惜，只係我自己心裡早已裝滿舊人，再也容唔落其他人。有時連自己都承認，旁人話我自私一啲都唔過分，浪費咗人嘅心意同時間，潛意識總係不自覺將對別人的感覺，複製貼上當初對你的愛，永遠拿人同你比較，永遠投入唔到新感情。

再被你提起 已是連名帶姓

謊稱是友誼 卻疏遠得可以

多少人愛我 偏放不下你

是公開的秘密

只剩你沒拆穿我

成年人最心酸嘅就係呢種境況，身邊從來唔缺愛自己、珍惜自己嘅人，可我偏偏心入面就淨係放不下你。呢份放不下從來唔使多講，身邊所有朋友其實都睇得一清二楚，早已係大家心照不宣嘅公開秘密。全世界都知我心裡仲有你、仲掛住你，唯獨得你，好似一直唔知情，又或者明知都唔願拆穿，維繫住連名帶姓嘅客套、似朋友又唔似朋友嘅疏遠關係。

再處心積慮 終究事不關己

哪來的勇氣 我就是不灰心

我且愛且走 其實在等你

是僅有的默契

明明知道再多執著、再多牽掛，對方嘅生活早已同自己事不關己，再多用心都只係自己一廂情願。但心底就有一份唔知邊度嚟嘅堅持，始終唔願意徹底灰心放棄。一路以嚟我睇落好似照常生活、隨遇而安，其實一直就咁且愛且走，外表向前行，內心默默都係等緊你。呢種唔需要講出口、唔需要約定嘅牽掛，就變成我哋之間僅剩嘅一份默契。

要是我們又錯過 就別再回頭

有過一次遺憾已經足夠令人難受，我真係好害怕我哋會再次錯過。如果緣分注定要一再擦肩，我覺得倒不如就此停落，唔好再拖拖拉拉、唔好再勉強回頭，免得繼續糾纏，只會增添更多傷感同失落。

而現實更加殘酷嘅係，我從來都冇十足嘅把握，冇把握可以重新行返埋一齊，冇把握可以修補從前嘅傷口，亦冇把握可以重拾當初嘅感覺。

愛呢個人，放又放唔低，等又等冇結果，想靠近又冇勇氣，想放手又捨不得，呢一種無力又無奈嘅心情，大概每個真心愛過、又未能走到最後嘅人，都會深深體會得到。

歌曲試聽連結：https://youtu.be/-jCvrtLkyVw?si=0R_TgMmDsx1Nsxu5

----------------------------------------------------------------------------------------------------------------

本欄旨在分享一些新舊中文情歌，並分享作者的感想。讓大家重新加深了解歌詞之意。勾起聽好歌興趣。