媽媽，我可以抱你嗎？別只一年一次感恩父母

啱啱過咗母親節，鋪天蓋地嘅祝福同溫柔慢慢淡落嚟，剛好聽起張惠妹一句歌詞：我可以抱你嗎？，突然有感而發。

我哋中國人向來都比較含蓄，講愛從來唔習慣大聲講出口。細個嘅時候，會黏住爸媽、撒嬌擁抱，覺得好自然；但去到青少年階段，開始長大，性格變得內斂，好多人反而會覺得，主動攬住父母、講一句我愛你，會好肉麻、好怪，有啲唔好意思。

好多嘢，都係等到自己長大成人，甚至自己做咗爸媽之後，先真正體會到父母嘅心情。先明白從細到大，佢哋默默付出嘅包容、擔心同愛，從來都唔會掛喺口邊，卻一直圍住我哋。

其實我哋唔應該一年得一次母親節、父親節，先至想起父母嘅偉大，先至講感恩。正如父母唔會每年兒童節至對我地好一樣（一笑）。父母嘅愛係日日都在，佢哋嘅付出係每一日，唔係得節日先值得被感謝。我哋反而應該將每日都當成母親節，日常多啲問候、多啲關心，唔好淨係節日先做形式。

呢個時候先發覺，原來歲月好殘忍。父母慢慢年長，頭髮白咗，皺紋多咗，身體亦都不如從前。人生最無奈嘅就係，同父母相處嘅時間，真係見一次就少一次。以前覺得佢哋永遠都喺度，永遠可以依靠，從來唔會諗分離；長大先驚覺，陪伴真嘅好短暫。

我哋總係以為有大把時間，遲啲再孝順、遲啲再表達，但時間從來唔等人。唔好等節日先想起祝福，唔好等失去先後悔從未講出口。

愛其實唔需要太華麗嘅儀式，唔需要好貴嘅禮物。一個擁抱、一句多謝、一句我掛住你、我愛你，就已經足夠。趁佢哋還在，趁我們還有機會，大膽啲抱一抱佢哋，大膽啲表達心意，珍惜每一次相聚嘅時光。

別讓含蓄，變成以後嘅遺憾。愛要及時，趁現在。