少時喜愛陳慧嫻，後來更懂林憶蓮

剛好林憶蓮喺啟德舉行演唱會，我又諗起一個關於佢作品既睇法。

喺我嘅成長歲月入面，有兩位同期嘅香港女歌手，一路陪伴住我由少年走到中年，佢哋就係陳慧嫻同林憶蓮。

如果要用一句話概括我一路以來嘅心態轉變，就係：少時喜愛陳慧嫻，後來更懂林憶蓮。

首先要講清楚，喺我心入面，兩位都係頂尖嘅好歌手，各有千秋，完全唔存在邊個更好。只係隨住歲月流逝，我自己嘅口味慢慢轉變，而呢種轉變，只係反映緊我嘅成長經歷同心境變化，並唔係對邊一位有所貶低。

講起呢段轉變，其實仲有一段好真實嘅少年小故事。

年輕嗰陣，我幾乎只鍾意聽陳慧嫻。佢嘅聲音乾淨通透，一塵不染，唱嘅愛情都係少年人心中最理想化嘅模樣，玻璃窗的愛、痴情意外⋯⋯唯美、含蓄、執著，就算有傷感，都只係淡淡嘅離愁，完全唔涉及現實入面嘅糾葛同慾望。或者當時嘅我，本身就有少少精神潔癖，對感情同音樂都好講究純淨。

記得當年，有一位女同学專登介紹我聽林憶蓮嗰首代表作 ——《激情》。

後來我一聽，第一反應竟然係有啲抗拒，覺得呢首歌情感太外放，聽落有少少露骨，完全唔係我當時可以接受嘅類型，所以一直刻意避開林憶蓮，更加鍾情陳慧嫻嗰種純情嘅風格。嗰個階段嘅我，對愛情嘅認知單純又嚮往，自然同陳慧嫻既歌一拍即合。

但隨住出嚟做嘢、喺社會打滚、開始拍拖戀愛，經歷過感情嘅起落同傷痛之後，我先至慢慢放下嗰份少年嘅執著，亦都真正聽得懂林憶蓮，更加聽得懂佢歌背後嘅深意。

粗略啲黎講：陳慧嫻唱嘅係少年心中嘅愛情童話，而林憶蓮唱嘅，或者先係真實嘅愛情本身。

我覺得佢嘅歌話俾我知，真正嘅愛情從來都唔係淨係純潔無瑕，反而係愛與恨交織，情與欲並存。有熾熱嘅牽掛，亦有本能嘅渴望；有溫柔嘅眷戀，亦有刻骨嘅傷痛。

林憶蓮就將呢種成年人愛情入面最真實、最赤裸嘅一面唱出嚟，不偽裝、不理想化，將都市男女心底嘅執念、孤獨、激情同掙扎全部演繹得入木三分。

唔知會唔會有朋友都同我一樣：少年時沉醉於陳慧嫻嘅純真，長大之後，先至被林憶蓮歌曲中嘅真實深深打動。

陳慧嫻留住咗我年少嘅純情（所以有時都會攞出黎重溫下），而林憶蓮，至係曾經陪我喺往後既感情風浪中既知音人。喺我地最傷心失落時提供心靈上既安慰。

而我對兩位歌手嘅偏好轉變，可能只係一個普通人由懵懂走向成熟嘅心境寫照而已。