幾段情歌 - 突然好想你《最痛的不是分開，而是分開後某個瞬間突然想起你》
五月天失戀三部曲
今期開始，我哋會連續寫三期，講五月天嘅失戀三部曲 ——《突然好想你》、《我不願讓你一個人》、《後來的我們》。
呢三首歌，好多朋友都鍾意，甚至喺唔同嘅人生階段，聽出唔同嘅感受。因為佢哋加埋，其實就係一個人由失戀到痊癒嘅完整旅程：先係猝不及防嘅思念，然後係放唔低嘅牽掛，最後係含淚放手嘅祝福。
我哋就用順敘嘅方式，跟住呢三段時間，慢慢講落去。
第一篇，由最痛嗰度開始。
突然好想你
主唱：五月天｜作詞：阿信｜作曲：阿信 出自 2008 年專輯《後青春期的詩》
最怕空氣突然安靜
最怕朋友突然的關心
最怕回憶突然翻滾絞痛著不平息
最怕突然聽到你的消息
分開之後，好多人都以為自己已經習慣咗。一個人食飯，一個人行街，一個人返屋企，燈掣自己開，水自己煲，乜都自己搞掂。以為咁就叫放低。
但係有陣時，可能只係一首歌，一個朋友圈動態，甚至一套舊電影解說視頻，空氣就咁突然靜落嚟，所有嘅防備，就咁瞬間崩潰。
原來從來冇放下，只係將回憶壓咗落心底，壓到連自己都睇唔到。但佢從來冇走過，只係等緊一個最唔提防嘅瞬間，一招致命。
想念如果會有聲音
不願那是悲傷的哭泣
事到如今終於讓自己屬於自己
只剩眼淚還騙不過自己
好多人都同自己講，已經過去咗，已經唔痛咗。日頭可以笑，夜晚參加飯局聚會，可以同人傾計，可以專心做嘢，好似乜事都冇。但係每個深夜，每個無人嘅角落，眼淚就係最誠實嘅證據。
人最大嘅自欺，就係以為唔提、唔諗、唔見，就等於忘記。但係心入面嗰個空位，唔會因為唔睇佢，就自動填返滿。
突然好想你 你會在哪裡 過得快樂或委屈
突然好想你 突然鋒利的回憶 突然模糊的眼睛
唔係慢慢諗起。係突然。毫無預兆，毫無準備，就咁撞入嚟。
行到曾經一齊行過嘅街，突然就諗起當日笑住拖住手嘅畫面；聽到曾經一齊聽過嘅歌，突然就諗起喺耳邊輕輕跟住唱嘅聲音；甚至只係見到一個相似嘅背影，個心就咁離一離。
唔知道而家對方喺邊，唔知道過得好唔好，唔知道有冇受委屈。想問，但知道已經冇資格問。
所以所有嘅思念，最後只能變成一句喺心入面講、永遠唔會送出嘅 —— 突然好想你。
我們像一首最美麗的歌曲 變成兩部悲傷的電影
為什麼你帶我走過最難忘的旅行
然後留下最痛的紀念品
曾經一齊編織嘅回憶，太美麗，太真實。一齊睇過最美嘅日落，一齊走過最黑嘅夜，喺最唔開心嘅時候有人攬住話唔怕有我喺度。嗰啲時光，係好多人成世人最珍惜嘅片段。
但係分開之後，呢啲回憶就變成最痛嘅紀念品。每一次諗起，都好似有人用刀輕輕咁喺舊傷口上面劃多一下。快樂係真嘅，痛都係真嘅。唔可以因為後來嘅痛，就否定從前嘅快樂；但亦都唔可以因為從前嘅快樂，就假裝後來嘅痛唔存在。
我們那麼甜那麼美那麼相信
那麼瘋那麼熱烈的曾經
為何我們還是要奔向各自的幸福 和遺憾中老去
曾經咁甜，咁美，咁相信彼此。曾經以為可以一輩子，曾經以為對方就係最後嗰個。但係最後，都係分開咗，各自走向自己嘅人生，帶住遺憾，繼續行落去。
有啲人，只可以陪住走一段路，唔可以陪到終點。佢哋出現嘅意義，或者就係教識人：咩野叫做愛，咩野叫做痛，以及甚麼叫做 —— 一輩子都忘記唔到。
最怕此生已經決心自己過沒有你
卻又突然聽到你的消息
最絕望嘅，唔係分開嗰一刻。而係終於下定決心，以為可以好好咁過冇左對方嘅生活，以為真係可以重新開始。但係只要突然聽到一點點消息 —— 朋友提起，社交媒體彈出，甚至只係一個同對方有關嘅名字 —— 所有嘅努力，瞬間瓦解。
原來「放下」從來都唔係一次性嘅決定。而係無數次崩潰之後，再無數次重新站起。以為已經好返，但其實只係學識咗將痛藏得更好，藏到連自己都呃埋。
呢首歌講嘅唔只係失戀。而係失戀之後，最真實、最赤裸嘅狀態：以為已經過去咗，但回憶從來冇放過任何人。某個瞬間，某首歌，某個場景，就可以將人打回原形。
而呢種「突然好想你」，先係分開之後，最長最長嘅酷刑。
----------------------------------------------------------------------------------------------------------------
本欄旨在分享一些新舊中文情歌，並分享作者的感想。讓大家重新加深了解歌詞之意。勾起聽好歌興趣。
留言