感欣的生活隨筆 - 從奧運談到孩子選科

最近DSE放榜成績公布咗，香港出咗八位狀元，好多都話要讀醫科為人民服務拯救生命，但最近新聞報道喺九間香港嘅大學學府有三個體育學士學位課程特別受學生歡迎，呢個係令大家值得關注嘅地方。

以前阿媽阿爸梗係想仔女做醫生、律師、建築師或者係讀工商管理系喺商界發展，讀完後可以有一技之長去搵食。有啲家長話細路揀體育科，因為佢哋懶唔想讀理論讀咁多書，體育科係讀少啲書，淨係鍛鍊身體同玩。

最近係法國舉行嘅奧運會，香港運動員江旻憓為我哋贏咗一面金牌，喺佢身上睇到，除咗佢有家底之外、佢仲要係學霸係法律系博士生，個樣仲要靚，簡直係人生勝利組完美嘅一個女仔。而張家朗出自體育世家，中四輟學成為專業運動員，兩次奪金真的可喜可賀，為他們作為港人一份子而驕傲。其實而家做運動員係好唔簡單，雖然做運動員嘅壽命比較短，但由細栽培到大嗰種嘅體力訓練、心機、時間同金錢係好可觀，十分唔簡單。我朋友覺得細路懶所以揀體育科呢個觀念，可能要有少少改觀。

做運動員你係要攞第一先至搵到食同光宗耀祖，喺鍛鍊當中嗰種艱辛只有自己先知道，自從李麗珊、張家朗、同埋江旻憓係奧運攞到金牌之後，運動兩個字喺香港成為追捧嘅活動。

其實父母應該話俾啲細路聽，如果佢哋揀咗體育學士學科課程，條出路係比其他學科更加艱辛更加要有堅持。參加體育學科，如果你冇夢想，你係好難堅持到做一個專業嘅運動員、運動教練或者體育從業員。

每個運動員係任何運動項目上面，當你要做鍛鍊嘅時候或者訓練嘅時候，你係孤單一個，係自己先至知道自己嘅身體狀況，及係曝曬、大風大雨嘅日子都仍然堅持孤獨一個去鍛鍊，嗰種嘅意志力係好堅定，香港精神永不放棄係咁樣練返嚟。

筆者運動唔叻，以前也參加過幾年渣打馬拉松10公里賽，跟過教練去做訓練，一個人喺太陽底下曬住跑，或者喺落雨天度跑，嗰種滋味真係練到你自己嘅意志力。但筆者很失敗，跑了幾年因為貪靚唔想再有雀斑就停咗。

所以深感做運動員係好唔簡單，如果你嘅仔女有選修體育學士學科嘅話，真的要好好話俾佢哋聽呢個係佢哋要有好堅持同埋好要有意志力行落去嘅選擇，因為係有時間、年齡同體力嘅限制。另外，其實讀運動學士課程係有好多好深嘅專業知識要讀，唔係想像中運動兩個字咁簡單架！

____________________________________________________________________

筆者：感欣

用感覺去欣賞世界，我們也時常感恩有你同行

快速消費品商業顧問

教育斜槓族：大學講師，幼稚園中小學課外活動老師，監考員，秘密調查員等等.....

讀者意見： joa22022024@hotmail.com