情侶嘅私密相同片，分手之後點算？

熱戀嘅時候，好多情侶會覺得，拍低一啲私密相或者短片，係兩個人之間嘅情調，代表住彼此嘅信任同埋親密。當下大家都覺得，呢段感情會一直落去，唔會諗到有朝一日會分開。

但感情最難預測嘅就係變化。今日可以毫無保留咁信賴對方，日後一旦反目，呢啲影像就有機會變成一把刺向自己嘅刀。唔一定係對方存心要傷害你，有可能係手機外洩、雲帳號被盜，又或者情緒激動嘅時候一時衝動，後果就會難以收拾。影像一旦流傳出去，就永遠冇辦法完全收返，對個人名譽同心理會造成好大打擊。

好多人會有一個誤解：當初係我自願俾佢拍，分手之後就冇權要求刪除。其實唔係咁。就算戀愛期間你同意拍攝，呢個同意只係屬於相處嗰段時間。一旦關係完結，你絕對有權要求對方刪晒所有照片、短片同埋備份，包括手機、電腦、雲盤入面嘅全部檔案。喺香港，就算係雙方自願拍下嘅私密影像，如果分手之後，對方威脅或者擅自發布，已經觸犯刑事罪行，會有刑責，唔係單純嘅感情糾紛咁簡單。

咁係唔係話情侶就絕對唔可以拍私密相？其實冇絕對嘅答案。 最重要嘅唔係道德上判斷呢件事係定唔係，而係要睇清背後嘅風險。

如果真係有自拍私密既喜好，有幾個底線一定要守住： 第一，千祈唔好將自己樣貌同私密畫面一齊出現，減低被辨認到嘅風險； 第二，唔好隨意上傳雲端，雲端帳號一旦被入侵，檔案就會外洩； 第三，永遠唔好被對方遊說、施壓先至拍，唔好因為怕對方唔開心就勉強自己，唔想拍就直接拒絕，真正珍惜你嘅人，會尊重你嘅決定。

而當分手一刻，第一件要處理嘅事，就係呢一批私密影像。最好用訊息留低記錄，明確要求對方刪除所有原件同備份。呢個訊息本身，都係日後如果發生問題嘅重要證據。

萬一遇到對方唔肯刪除，甚至拿呢啲相嚟威脅、要脅，千祈唔好妥協同埋唔好驚，唔好自己私下忍讓，要即刻保留晒所有對話記錄，尋求警方或者法律協助，唔好俾人拿住你嘅私隱作為籌碼。

愛情入面嘅信任好珍貴，但信任唔等於要將自己全部嘅安危，交晒畀另一個人手上。熱戀嘅時候可以盡情投入，但都要留返一份保護自己嘅清醒。