幾段情歌 - 微涼《秋風每每觸及我們心深處的遺憾》
3小时前
讀畢需時 2 分鐘
歌：林憶蓮｜詞：小美｜曲：黃啟華｜1989
秋天嘅涼意從來唔係突如其來，係一陣陣，慢慢鑽進衫領。一個人企喺街外，風吹過來，不自覺攬實自己膊頭，呢個時候聽《微涼》，份感覺先至最貼心。唔係撕心裂肺嘅痛，只係一種淡淡的、講唔出口嘅悵然，隨住秋風輕輕裹住自己。
微涼的秋，蕩來傷口，微涼的酒，苦澀輕透，微涼是我，未忘藉口，道別某個深秋
原來當年嘅道別，都係發生喺秋天。時光一年年轉，又行到呢個季節。秋風一吹，舊回憶就悄悄浮返上嚟。唔需要飲酒，單單呢份秋涼，已經足夠勾起當日嘅畫面。當日講過嘅藉口、當時難捨嘅心情，一直收埋喺心底，冇真正淡忘。
為何當天，不懂去愛，為何分開，方知熱愛 ，為何夜了，蕩來感慨，是否不應該
好多遺憾，都離不開呢一句自問。相愛嘅時候，習慣咗對方嘅陪伴，以為一切理所當然。等到人已經走遠，緣份已經完結，先猛然醒覺，當時嘅熱愛有多珍貴。呢種後悔唔會大聲喊出嚟，只係靜靜留喺心裡，每當秋風起，都忍唔住會再問自己一次。
匆匆一生獨自上途，風乾情感的苦惱
日子一路向前，好多傷痛好似已經風乾，以為自己練就獨自上路嘅本領。以為早就跨過咗呢段往事。但係秋夜嘅風好特別，一個人企喺街頭，攬實自己，先發覺，有些感覺從來冇徹底消失。
呢首歌嘅情緒，就係秋天本身。唔會劇烈，唔會灼人，只係一陣若有若無嘅涼。唔想去挽回，亦唔強迫自己要放下。就咁任由秋風包圍自己，任由呢份微涼嘅遺憾，陪自己靜靜企一陣。
----------------------------------------------------------------------------------------------------------------
本欄旨在分享一些新舊中文情歌，並分享作者的感想。讓大家重新加深了解歌詞之意。勾起聽好歌興趣。
留言