感欣的生活隨筆 - 真的容不下軟弱嗎？

時代不斷改變， 近這2年被AI的出現攪到真的有點不知所措， 工作已經被AI威脅，又怕被不法騙徒用AI技術騙財騙色。 更唔識點教仔AI課題。 跟住返工如要面對啲八婆八公死敵就更慘。 無人能明白自己的苦處要在家、在小朋友及在人面前不斷頂硬上的滋味。 強人是這樣形成的， 自己不斷的去追市場去衝工作。 工作上的心狠手辣是訓練出來的。 通常高職位的女士們都以惡及命令式的去壓場。

女人怎麼減壓？ 不可告人的家事可以去幫襯美容院， 同你無任何瓜葛嘅美容師在2個鐘頭內大吐苦水， 爆喊一場及盡情傾心事。 或者同sales傾跟住順便買埋心水靚嘢當答謝。 同姊妹傾？ 陣間唔知變咗咩版本嘅是非出嚟， 爆你大獲就更麻煩。 女人始終比較都會有一定多多少少的小氣及妒嫉心。

但我們彷彿遺忘了有個人可以被自己放下來展現自己軟弱的一面， 放下來需要support的一面。 他就是你的伴侶或是你老公。

你有時有無發覺， 你當咗你伴侶或老公係你下屬係咁使？ 或將佢睇低一線？

『喂! 你係度託呀？ 仲唔去洗碗？』

『死嘢! 淨係你先至有返工呀! 我無返工嘅？ 叫你做嘢係唔係唔得先？』

『我洗唔洗要問過你先至做吖，先至買吖？』

『你死廢柴! 燈膽都唔識換，等我嚟！ 』

『晚晚咁夜返，電話都無個，去溝女呀？』

你有無似曾相識呢？ 你好似已接受唔到自己有軟弱嘅一刻，更加接受唔到你隔離果個比你更弱雞。

以前王菲有首經典歌 『容易受傷的女人』唱到街知巷聞， 自己都好有共鳴。 其實女人真係好易氹。 記得初初有網上感情騙案發生時， 係有一單案個富婆被人隔空氹氹吓就無咗2個億。 我想帶出嘅唔係話女人易受欺騙。 而係人哋想氹你， 你都要比個位人入架! 其實女人係可以受傷有軟弱的一面被人呵護被人保護的。 男人嘅天性係有好想保護女人嘅意識同能力。 大家生活在一起長久了， 只係有時你可能覺得你比佢走得更遠及工作上比佢做得更勝一籌而看他低一線， 更甚看不上他一眼。

你有否想過有時女人的軟弱會帶來你身邊那個佢的欣賞和使他有強壯的一面呢？

其實男士最Charming嘅時候係佢很專注用心去工作的時刻。 但呢啲佢最Charming嘅moment大多數只會係公司發生， 你係睇唔度， 而很多時會被女同事發現及偷偷仰慕。 佢嘅專業同專長真的很多時係屋企係用唔到架。 你只係見到你隔離果個係屋企無能嘅一面。

其實男人都有軟弱的一面， 如果當有個男人係你面前流淚， 那是應該很大獲的事。可能是沒有彎轉的事了。

前幾年迪士尼有套戲 『Inside Out』， 講人是需要有喜怒哀樂各種情感。 不需要時時刻刻保持開心的心情。 你真的是可以喊， 喊完你會覺得舒服很多。 心中的壓抑得釋放。

你何須時時刻刻吓吓係佢面前咁強勢呢？

____________________________________________________________________

筆者：感欣

用感覺去欣賞世界，我們也時常感恩有你同行

快速消費品商業顧問

教育斜槓族：大學講師，幼稚園中小學課外活動老師，監考員，秘密調查員等等.....

讀者意見： joa22022024@hotmail.com