感欣的生活隨筆 - 男女花錢大不同

疫情嗰幾年，大家都喺屋企困獸鬥，每個家庭成員都十分有情緒，更甚有啲人搞到要離婚。開關後大家情緒都應該好好多，而家唔去遠旅行都可以去北上深圳玩。

去旅行可以係簡單亦都可以係好複雜的事，其花費浮動上下也很大，有家庭的媽咪很喜歡一家大細，每年一至兩次去旅行，花費可豐儉由人。喺女人角度睇梗係自己唔使再困喺屋企由朝到晚做家務又返工，去外國盡情享受係最開心，因為成家都受惠去shopping、去食好嘢、去住靚酒店relax下。但你發覺你做呢個決定嘅時候，你隔籬嗰個就會阿吱阿咗。佢話你去到日本只會瘋狂買嘢shopping，由朝行到晚好似將成年要行路嘅腳骨力一日做晒。你會覺得你隔籬嗰個唔明白你嘅用心囉！

你嘅男人可能想花錢買大電視機而代替旅行，跟住駁個靚Bose喇叭成家享受個音響，同個仔喺大電視機面前打機同睇球好爽。但呢啲嘢女人係唔會欣賞，你會諗個電視機都冇爛冇壞點解要買個新嘅呢？

點用錢？點樣分配資源？拗撬就係咁樣嚟啦。

有錢做齊兩樣嘢，梗係大家都開心㗎！但如果要分先後次序配置資源咁點樣呢？男人嗰個可能諗緊買電視機喺屋企可以日日享受，而去旅行只係享受嗰四五日就冇咗啦。

「喂，你可唔可以俾我話事先呢？」

「暑期就嚟個仔梗係要學嘢呀，唔好令佢偷懶，要keep住個進度啦!」

「你唔好掛住追你嘅手機、電視、手錶嘅新Model啦！」

其實我哋缺乏咗聆聽嘅耐性，男人通常一句起兩句止，佢唔會好細膩咁話俾你聽佢嘅諗法買嗰樣嘢背後嘅原因俾你聽去考慮吓買邊樣先。

其實可能佢會用心良苦㗎！

我有個姊妹佢男朋友兩年前買咗個 i-Phone 13俾佢做生日禮物，佢同我講點解男朋友唔買個名牌靚袋俾佢呢？嗰份禮物當初佢唔係好識欣賞，但當佢聽完佢男友嘅理由後就覺得好開心同好貼心，因為佢男友話俾佢聽個iPhone功能喺工作上十分有用，做嘢會快好多，有1TB存量，我女朋友可以儲好多靚相。嗱！儲好多靚相呢樣嘢，我姊妹係十分之鍾意㗎，因為佢真係好緊張啲靚相嘅人。啲靚相係可以留住個美好回憶，留住佢後生嗰時個靚樣係好緊要㗎！

可能聽聽你隔籬嗰個嘅心聲，你會更有著數呢？

____________________________________________________________________

筆者：感欣

用感覺去欣賞世界，我們也時常感恩有你同行

快速消費品商業顧問

教育斜槓族：大學講師，幼稚園中小學課外活動老師，監考員，秘密調查員等等.....

讀者意見： joa22022024@hotmail.com